Ua ripotia ma fa’amaonia mai e le Matagaluega o le Soifua Maloloina le faaopoopo ai o le to’a 129 o i latou fou mai le mamalu o le atunu’u lautele ua a’afia i le siama o le Koviti-19.
Ua oo atu ai nei le aofai o i latou ua aafia atunu’u lautele talu ona pepesi i tua le fa’ama’i i le Aso 17 Mati 2022 i le to’a 1493, ae mo le taimi nei ua na’o le 1,330 i latou o lo’o a’afia pea poo active cases o lona uiga o le isi silia i le to’a 100 ua manuia ma ua le toe aafia i le faama’i.
O le 97% o e ua a’afia mai le mamalu o le atunu’u lautele, o lo’o nonofo i Upolu a’o le 3% o lo’o aumau i Savai’i ma o lo’o tumau pea le malu puipuia o Motu o Manono ma Apolima Tai e aunoa ma se tasi ua pesia.
O lo’o fa’amauina fo’i e le Matāgaluega o le Soifua Mālōlōina e tusa ma le 56% o e ua a’afia o tama’ita’i a’o le 44% o ali’i ma e to’a 7 le aofaiga o i latou ua aafia o loo i le falemai tele i Motootua.
O loo fautuaina pea le atunuu ina ia tausisi i poloaiga o vavao ua iai Samoa aua lava le saogalemu mai le soona pepesi ai o le faama’i.
