Ua toe faaauau le fesoasoani a le malo mo le suauu faapea tau o femalagaa’iga lautele seia oo atu I le 2023. 

O le aso 15 o Aokuso lea na faapea o le a faauma ai le faamāmā avega o loo ‘afa ai nei le tau o pasese o femalagaa’iga lautele faapea le 25 sene o loo pa’ū ai le tau o le suauu, peitai o le faasilasilaga ananafi ua sau ai o le a faaauau mo le isi lima masina seia oo i le faai’uga o Ianuari 2023. 
O se fesoasoani ua sau ai ananafi a o tālia i le asō fuainumera a le CPI poo le Consumer Price Index lea o loo fuafua o le a sii i le 6.69%. 

I se saunoaga a le minisita o tupe ananafi a o fofoga mai ai le faai’uga a le malo, Grant Robertson e talitonu o se lima masina ma nai aso faaopoopo o le a talia ma le fiafia e tagata Niu Sila a o taugata ai le soifuaga. 

O le tuu foi i le aso 31 o Ianuari e faauma ai, o se aso o loo iai le vaai mamao e tatau ona toe sau ai i lalo le suauu ae alu i luga totogi. 

O le tau atoa o lea faamāmā avega e $589 miliona le suauu, ae $63.1 miliona mo le tau o pasese e faaaogā ai femalagaa’iga lautele. 
Mai ia Robertson, o se fesoasoani a le malo e lē faavavau ma o lea foi o loo faia galuega mo le taimi e faamuta ai.