E $6 miliona ua toe faaopoopo e le malo e fesoasoani ai food banks, a o taugata le soifuaga ma o lea foi o le a uma le fesoasoani o loo pa’ū ai le tau o le suauu faapea le pa’ū o le tau o femalagaa’iga lautele.
O le faasilasilaga lea mai le Sui Palemia, Carmel Sepuloni ma o se fesoasoani tupe e mo food banks uma i totonu o le atunuu.
A o fai mai ai e mo vaega uma o Niu Sila, o Aukilani, Tairawhiti ma Hawke’s Bay o le a muamua manuia i le vaega tupe ua faailoa mai, ona o loo fua i le toatele ma le tele o le manao o iai.
Fai mai Sepuloni o se fesoasoani mo meaai ua toe aumai e le malo ona o le taugata tele o le soifuaga ua iai, ma o le faaopoopoga lea i le $24 miliona na faailoa mai i le paketi na fofola mai i le masina talu ai.
Ua teena e le Sui Palemia faamatalaga e lei lelei ona faia fuafuaga a le malo e tusa ma le toe faaopoopo a o lea faatoa tasi le masina talu ona faailoa mai le paketi.
