O se fiafiaga i tamaitai Pasefika o loo aotauina i le kolisi maualuga a Napier Girls’ High le aloaia o le ie lavalava o se tasi o suiga faaopoopo i le togiga a le kolisi.
Sa na o se manatu, seia oo mai ai ina faatalosagaina le puleaoga faapea le faiaoga o loo vaaia fanau aoga Pasefika, ma oo mai ai nei i le taunuuga manuia ua iai.
E tolu tausaga o tapena mai ma o le ie lavalava lanu moana e lomia ai fugalaau faapea ai ma le pine a le laumua i le isi itu, lea ua taunuu iai i le mae’a fuafua ma faia fesuiaiga ina ia mautinoa e talafeagai ma fiafia iai tamaitai aoga.
Ua lipotia e le Herald, o se fiafiaga i tamaitai aoga le suiga faaopoopo ua iai, ma e le gata ai la i le mitamitaga o tamaitai Pasefika ae faapea ai ma isi e lē o ni Pasefika.
