Ua lipotia i le asō o le a faaopoopo e le faigamalo a le palemia o loo iai nei Anthony Albanese le aofai o tagata faigaluega e iai tomai e malaga mai ai i totonu o le atunuu ma o le a faagata i le 195 afe avanoa e ofoina i le tausaga faaletupe lenei.
O le folasaga lea na faia e le minisita o mataupu faalotoifale o Clare O’Neil i le aso faaiu o le jobs summit e pei ona faagasolo nei i Canberra. O lona uiga ua tele le avanoa o le a tuuina i tagata faigaluega mai fafo atu o Ausetalia, i latou e iai tomai faapitoa, e malaga mai ai i Ausetalia nei ma faigaluega ai i galuega talafeagai.
O le faamoemoe autu o le malo ina ia fesoasoani lea faiga e foia ai le faafitauli o loo feagai nei ma le atunuu i le le lava o tagata faigaluega.
