Ua faailoa e le asosi o le taaloga faigafaiva faavaomalo a Samoa le faaopoopo o aufagogota ua tausiniō i le taamilosaga lona 26 lea na tatala e le ta’ita’i o le malo le afioga i le Palemia i le Aso Toonai na te’a nei.

O se taamilosaga ua faia faatasi ma se isi o tausinioga o le taaloga lava lenei o faigafaiva i ogasami loloto o le tatou atunuu e tausinio ai au mai atumotu o le Pasefika.

O aufagogota mai Samoa, Amerika Samoa, Niu Sila ma Ausetalia o loo auai i le taamilosaga ma o le faai’uga o lenei vaiaso o le a mae’a ai ma lauina ai togi.

O vaega masani e togi iai le taamilosaga, o le i’a e sili ona mamafa, ma ituaiga o i’a e maua ma le tuuaofa’iga o le mamafa o i’a e maua e se autauvā.

E iai foi isi vaega o loo faamasino iai le tausinioga lea o loo auai aufagogota a alii ma tamaitai.

O le nofoaga tutotonu o le faalapotopotoga o aufagogota a le atunuu le Samoa International Game Fishing Association i Matautu-tai i se vaega e sosoo ma le uafu tele o loo faamautū iai vaa fagota uma a aufagogota o loo tausinio.