E matuai lagona le faanoanoa o se tamā mai Kalaiesetete ina ua osofaia si ona atalii e iai manaoga tumau i luga o le pasi i se taimi e lei mamao atu.

Fai mai le One News o le tamaititi na agai ese mai ma le pasi na malaga atu ai i le vaega e sui ai pasi i le ogatotonugalemu o Kalaiesetete ae osofai ai e se kulupu o tama talavou. 

Na amata i le tulei ese o si tama ma lona nofoa ma oo ai lava ina faaoolima iai i latou ia ae matamata lelei iai nisi o le pasese sa iai i lea taimi.

Fai mai lipoti na tetee ane lava e si tamaititi osofaiga a le aualii ia seia oo ina agai ane loa iai le avepasi ma sosola ese ai i latou ia ma valaau ai loa ma leoleo.

Ua faamatala e le tamā o le tamaititi i le televise tasi, o pasi ia e feoai i kalaiesetete e foliga ua iai lo latou talaaga i le lē saogalemu i po ma ua valaau ai ua tatau nei ona faia ni suiga i tulafono mo le malupuipuia o tagata i nei nofoaga aemaise o femalagaa’iga lautele.