Ua toe maua le olataga o le Ruapehu Alpine Lifts mo faaseega i le aisa i lenei tau malulu, ona o le fesoasoani a le malo.
E $5 miliona lea ua polomisi ai le malo agai i pulega ua vaaia nei le kamupani i le mae’a tuuina aloaia atu iai i le vaiaso talu ai latou te sailia poo ai sē e faatau agai iai le pisinisi faapea ana aseta ona ua gau.
Fai mai le minisita o atina’e faaitumalo Kiri Allan, o le sao o le malo o le a faatupe ai le pisinisi a o faia feutanaiga e faatau ese atu ai.
O le tausaga talu ai na faailoa ai e le malo e le toe iai se isi ana fesoasoani tupe mo le Ruapehu Alpine Lifts, peitai i saunoaga a le Sui Palemia, Carmel Sepuloni ananafi, ona o lea ua leai lava se isi e tua iai le kamupani o lea ua aapa mai ai le malo.
Na saunoa le Palemia, Chris Hipkins, a o talanoa mai ai Saina ananafi o faaseega nei i Ruapehu o loo tele lona sao i le tamaoaiga o le North Island.
