O tausi soifua e to’alima mai le to’aono na aafia i le siama na faapena ona faanofoesea i nofoaga faapitoa o loo faaauau pea ona nofoesea seia oo i le taimi e faamautu ai ua malolosi atoaatoa ma toe taliu ai i o latou aiga.
E pei ona silafia ua malolosi uma le pasese e to’a 25 mai Brisbane Ausetalia na taunuu atu i le atunuu i le Aso 19 o Ianuari 2022 ua aafiai le siama o le faama’i Koviti19. O le toatasi o lea aofaiga o le pasese na aafia na ia tuua le nofoaga faapitoa i le maota gasegase i Motootua i le Aso Lulu le nofoaga lea na faanofoesea ai ina ua maea lana suega lona tolu o tumau pea ona leai se siama o toe aafia ai.
O le feiloaiga a le taitai o le Mālō le Palemia Fiame Naomi Mataafa ma le vasega o tusitala na ia faailoa ai ia vaega iai latou na aafia i le siama o le faama’i. Ae i se vaaiga lata mai i tui puipui ua sii laititi nei le pasene o tagata ua maea tui e lua i le 89.5% ae o tagata ua uma le tui muamua e 97%.
O faamaumauga ia o i le matutua e 18 agai i luma le matua o le soifua. O loo faatali nei le kapeneta se ripoti a le Matagaluega o le Soifua Maloloina i ni vailaau o le tui puipui o le faama’i e le’o mafai ona faaaoga ona o le faaletonu i le malosi o le pusaaisa sa teu malu ai ia vailaau.
Faaalia e Fiame o le uta e 10,000 vailaau o le AstraZeneca lea na faameaalofa atu ai Ausetalia talu ai nei ua aafia i lea faaletonu.
