Ua faatino gaioiga talafeagai uma e le Malo mo le faia o se togafiti e fofō ai le faaletonu o le eletise i le motu o Upolu, e pei ona aumai afi e faaaogā faavaitaimi e fesoasoani i le faaletonu, ae ua faatau mai foi afi fou e lua lea e taunuu ia Aokuso.
Ae i le feiloa’iga a tusitala ma le ta’ita’i o le Faatuatua i le Atua Samoa ua Tasi na faaalia ai e le susuga Laauli Leuatea Polataivao Fosi Schmidt, ua latou molimauina ua leai se fesoota’iga i le Palemia ma nisi o Minisita o le Kapeneta i le sa’ilia o se fofō i le faaletonu o le eletise.
E faasino le finagalo o Laauli i le faailoa e le Minisita o le eletise ua ia manatu e fai se su’esu’ega e sa’ili ai mafua’aga o le faaletonu, ae o le Minisita o Tupe ua ia faailoa le tatau ona faatino o se State of Emergency poo le faia o se faasilasilaga e le malo e faamauina aloa’ia ai le aafia o le motu o Upolu i tulaga ma’ale’ale ona o faaletonu i le eletise.
O le feiloa’iga a tusitala ma le tamaitai Palemia i le Aso Gafua ua mavae na faaalia ai e le afioga Fiame Naomi Mataafa, o loo faamuamua le sa’ili o se fofō e taofia ai le faaletonu i le auaunaga o le eletise, ona faato’ā silasila ai lea i se komisi su’esu’e, ae o se fuafuaga faapea e alu ai ma tupe a le malo.
