O le Aso Tofi nei o le a tuua ai le atunuu e le vaega to’atele o le autaaalo a le atunuu mo taaloga a Malo o le Taupulega, ina ua mae’a ona faamavae atu le Malo ma momoli foi upu faamalosi’au i le pulega ma le autaaalo, i se sauniga na faia i le maota o le Pulega o Tagata Tafafao.

Sa avea ai le Sui Palemia le afioga Tuala Tevaga Iosefo Ponifasio ma sui o le Malo e molimoli se upu e faalaei’au ai le ‘au masii a Samoa mo ia taaloga faavaomalo o le a tausinio ai atunuu e 70 o sui o Malo o le Taupulega. E 38 le au taalo, toia 20 le pulega o le Peresetene ma le Failautusi o le faalapotopotoga o taaloga le SASNOC o le a malaga.

O  taaloga mulimuli a Malo o le Taupulega sa faia i le Cold Coast i Ausetalia i le tausaga e 2018 na maua ai e Samoa pine auro, o siliva ma apamemea ma sa ausia ai le tulaga 17 i le faatulagana o atunuu e 71 sa auai ma tausinio i lea tausaga. O le aso 28 o Iulai e amatalia ai taaloga nei i le aai o Burmingham i Peretania.