O le avea ai o le faalapotopotoga o le faaputugatupe o le lumana’i manuia o tagata poo le NPF o le faisea autū mo lea pisinisi tau faletalimalo i le atunuu le Sheraton i Mulifanua, ua faailoa ai e le minisita o lea faalapotopotoga le afioga Mulipola Anarosa Ale Molioo le faasee atu o lea pisinisi i se pulega fou e amata ia Ianuari o le tausaga 2026.
Ua ave ai le faafetai a le minisita i le kamupanī o le Marriot sa pulea le Sheraton Samoa Beach Resort mo le umi e sefulu tausaga.
Ua faailoa ai e le minisita e lē o ni faaletonu i le pulea o le Sheraton i Mulifanua le māfua’aga ae o fuafuaga a lea kamupani i le lumana’i mo le faasaoina o ana tupe.
O le faai’uga o le masina fou o Tesema e mae’a ai le pulega a lea kamupani.
O se tala fiafia e leai ni suiga i le aufaigaluega ona o le a faaauau pea ona galulue i lalo o le pulega fou i le faamalumaluga a le kamupani o le Mulifanua Beach Resort Limited.
Se’ia vaganā nisi o le aufaigaluega e fia tuua lana galuega i lana lava faai’uga.
O le maliega na faia e le Komiti Faafoe o le pulega o lea faletalimalo ma le kamupani o le Marriot ua faatino ai lea suiga, peita’i e lē o aafia le pulea e lea kamupani o isi faletalimalo i Samoa o loo latou faipaaga.
