Ua talia e le taitai o le Itu agai le folasaga faamalamalama a le afioga i le Minisita o Pisinisi Alamanuia ma Leipa, le tofa Leatinuu Faumuina Wayne Sooialo. 

I le fuafuaga a le Malo i galuega faavaitaimi sa ia faamanino ai e le taofia ia avanoa faigaluega e faaauau pea, ae na pau le itu o loo fia faia iai se laveai o faafitauli ua tutupu ma aliali mai. Sa faailoa foi e le Minisita i le Palemene ina ua tali i finagalo o sui faipule sa fesiligia lea tulaga, o le amataga o le polokalame sa fuafua mo ē e le o iai ni galuega, peitai ina ua tupu ma ola le polokalame, ua faapena ona malaga ai ma e o loo maua galuega.

E pei ona silafia o nisi lipoti i faafitauli nei sa faaalia ai e le Minisita ua oo lava i nisi o loo iai tomai aoaoina tau faia’oga ua o ai foi ma latou i ia galuega. O se tasi o faafitauli sili ona tuga o i latou ua fai toalua ma iai fanau, ua faaletonu atu ai. O le vaiaso fou e toe foi mai ai i Samoa le silia i le luaselau tagata faigaluega faavaitaimi ua latou soli aiaiga o tulafono o ia galuega ma ua faamuta ai ma avanoa.

E to’a 18 ni tamaitai o le a malaga mai ai ma a latou pepe fou i lea faigamalaga. Ua faailoa e le tofa Leatinuu i le Palemene ua iai se komiti o le a tagofia le toe iloiloina o ia avanoa faigaluega ma o sui o lea komiti ua aofia ai ma sui o ofisa o le Malo Niu Sila ma Ausetalia. O ni fautuaga a lea komiti i se latou lipoti o le a tapena, ua faamoemoe e tuuina atu i le kapeneta mo se iloiloga ma se faai’uga. 

Ae mo le tulafono taufaaofi o le va lelei o e ana galuega ma tagata faigaluega i pisinisi tuma’oti lea o loo aofia ai ni teuteuga mo galuega faavaitaimi i fafo, o lea ua mae’a tali le Minisita ma ua faasee atu nei i se komiti faapalemene mo le saga iloiloina ma valaau foi ni finagalo o le atunuu ona toe foi ai lea i le Palemene mo le iloiloga faaiu ma le faitauga lona tolu e pasia aloaia ai.