O le mae’a faaulu ai i leoleo o le tagi a le afioga ia Loau Keneti Sio ma lona faletua, ua faailoa ai e le Komesina o leoleo, Falepuipui ma le Toefuata’ina e to’afā (4) tagata ua molia ai. O le to’afā ua molia, o ni alii se toalua ma ni tamaitai e toalua, o i latou uma e mai le aiga o le nuu o Faleula na faaumatia lo latou fale ma isi meatotino e pei o taavale i le malaia poo le afi.
Ua molia i latou i solitulafono e pei o le faaoolima, tu fua i le fanua e aunoa ma se mafuaaga tatau, umia o se aupega mata’utia, faia o se gaioiga solitulafono na faatupuina ai ni manu’a, ma le faamoemoe e faaleaga ni meatotino. O le tagi a le faipule o Sagaga tasi ma lona faletua na mafua mai i se fe’ese’esea’iga faalotoifale ma le aiga na faaleagaina a latou meatotino i le afi ona o mataupu tau fanua o le nuu o Faleula.
O le aiga na muamua faaulu le latou tagi ma faia ai e leoleo moliaga faasaga i le afioga ia Loau Solamalemalo Keneti Sio ma lona faletua o Malama. O le masina fou o Iulai e valaau ai i le faamasinoga moliaga o i latou uma ua molia i lea vevesi. O tagata e to’afā o le aiga ua molia o loo tatala i aiaiga masani o le saini i le ofisa o leoleo ma taofia tusifolau.
