O le Aso Faraile 24 o le masina fou o Aperila ua faatulaga e faia ai le palota laitiiti a le itumalo palota o Vaimauga 3 e pei ona faailoa mai e se molimau faatuatuaina.
O lea aso atofaina mo le toe faia o le filifiliga a lea itumalo e sa’ili ai sona sui usufono i le paea’iga 18 a le Palemene.
Ua faailoa lautele ai e le ofisa o le komisi o faigāpalota e tapunia talosaga mo le faia o lesitala o tagata palota mo Vaimauga 3 i le Aso Faraile le aso 3 o Aperila.
E tolu vaiaso talu ona mae’a tapunia le lola a lea itumalo ona faia lea o lana palota laitiiti.
E tasi le māfua’aga na faamavae ai le tofi o Vaisigano 2 ma Vaimauga 3 o le fia avea ma sui auai o le vaega faaupufai o loo tu nei i le foe o le pulega o le malo, ma ua to’alua ai sui usufono o le paea’iga 18 o loo iai nei a le Palemene ua faamavae.
Ua toe filifilia e Vaisigano 2 le afioga Motuopuaa Seve Henney Afereti Papalii i le mae’a o le palota laitiiti a lea itumalo ae ua tālia nei se finagalo o Vaimauga 3 i lana palota laitiiti i le aso 24 o Aperila.
E le’i maua se finagalo o le Komesina o faigāpalota ona o loo ave ona aso mālōlō ae ua faailoa mai e le sui Komesina o faigāpalota o le aso 30 o le masina nei o Mati e faalaua’itele ai le faasilasilaga masani e faailoa ai tapenaga e aofia ai ma le aso ua atofa o lea palota laitiiti.
O le Aso Tofi o lenei vaiaso na faailoa lautele ai e le ofisa o le komisi o faigāpalota le aso e tapunia ai talosaga mo le lesitala o tagata palota o Vaimauga 3 lea ua atofaina mo le aso 3 o Aperila.
