Ua mae’a sainia e le Tamaitai Palemia o Samoa Afioga Fiame Naomi Mata’afa pepa o le fesoasoani a le malo o Iapani mo vasega Faasaienisi o mataupu tau Soifua Maloloina, Faculty of Health Science, o lea fesoasoani o le a mafai ona fausia ai e le malo o Iapani se fogafale tolu ma e silia i le 40 miliona tala e foai.

O le a iai foi le vaega mo aoaoga o vailaau.

O lea fale o le a mafai ona iai le potu aupito sili ona tele mo aoaoga e tusa ma le 300 tagata e ofi ai.

O le a iai foi potu mo suesuega faasaienisi, o ofisa o le aufaigaluega, o potu e faia ai feiloaiga a faiaoga ma tamaitai aoga e faalauaitele ai mataupu sa aoaoina.

Sa faailoa na talosaga le Iunivesite Aoao mo se nofoaga tutotonu o aoaoga e fia fausia, lea la ua aapa mai ai lea malo e fesoasoani.

O Iapani le atunuu na aumai la latou vaega o fomai tomai faapitoa i vailaau i le taimi o le misela faapea foi i le Koviti ma iu ai ina latou faamuamua le aoaoaina o le aufaigaluega faapitoa i vaega e vaai toto’a i le itu tau soifua maloloina, o le soifua maloloina o tagata lautele, o tuipuipui, ma le faaluiloa o itu tau soifua maloloina.

O le asiasiga a le Minisita o le Va i Fafo o lea malo lea na sainia ai ma le Afioga i le Tamaitai Palemia o Samoa lea foai.