Ua faamautu nei i se finagalo o le Kapeneta ua faaiugafonoina, suiga i faiga faavae mo polokame o galuega faavaitaimi, e le gata o galuega i totonu o faatoaga, ae o galuega foi e pei o le kamuta, ma le fasimanu faapea isi galuega o loo tuua ai le atunuu e o tatou tagata mo ia galuega i Niu Sila ma Ausetalia. 

Ua ave le faamuamua o ia faiga faavae i le avanoa mo tagata e le o maua ni galuega, ma e patino tonu lea i tagata ua ono masina e lei maua se galuega.

Ia mautinoa o ia avanoa ia laugatasia uma ai le atunuu e ala lea i le tuuina atu o le filiina o tagata i komiti a nuu ma itumalo.

Ua faamauina foi i ia faiga faavae le tatau ona maua o le taui talafeagai mo i latou uma e agavaa mo ia avanoa faigaluega.

O le saogalemu o tagata o le isi itu tāua ua aiaia i ia faiga faavae fou, ma ua faamautu ai ma le faatulafono o auaunaga eseese o loo latou sailia ma ave tagata mo ia galuega.

O le faatulafonoina o lea faiga o le a mautinoa ai le tatau ona usitaia o aiaiga o konekalate mo ia galuega ma ia alofia ai ni auala faaalatua. O lea faiga faavae e ao foi ona tausisia e galuega o loo fitoitonu i latou ma le sailia o a latou tagata faigaluega, ma ia ogatotonugalemu le Malo i feuiuiaiga uma.

O lona uiga e tatau ona silafia e le Malo tulaga uma o ni tuutuuga.

Ua iai foi le faiga faavae ua faamalosia ai le tāua o le feutagai o le Malo o Samoa ma Malo o Niu Sila ma Ausetalia i le faatumauina o le atoatoa ona lelei o le tapenaina o tagata e maua ia galuega, e le gata o aiaiga o galuega i totogi, ae o lo latou puipuiga, le soifua maloloina, ma le saogalemu.