Ua faamaonia mai i ripoti lata mai a le Matagaluega a le Soifua Maloloina e to’a 125 i latou fou ua faaopoopo i le mamalu o le atunuu lautele ua aafia i le siama o le faamai o le Koviti ma oo atu ai le fainumera i le to’a 1364.
O le fainumera lea o tagata ua aafia talu ona pepesi le faama’i mai le Aso 17 o Mati 2022 ae mo le taimi nei ua na’o le to’a 1,288 o loo aafia pea (active cases). O le 96% o e ua a’afia mai le mamalu o le atunu’u lautele, o lo’o nonofo i Upolu a’o le 4% o lo’o aumau i Savai’i ma o lo’o tumau pea le malu puipuia o Motu o Manono ma Apolima e aunoa ma se tasi ua pesia.
I faamaumauga a le Matagaluega i tagata ua aafia ma o latou tausaga;
0-4 tausaga – 64
5-9 tausaga – 27
10-14 tausaga – 83
15-19 tausaga – 154
20-24 tausaga – 152
25-29 tausaga – 192
30-34 tausaga – 136
35-39 tausaga – 109
40-44 tausaga – 85
45-49 tausaga – 89
50-54 tausaga – 93
55-59 tausaga 65
60-64 tausaga 38
65+ tausaga – 56
Unknown (Le’o mautinoa tausaga) – 23
O lo’o fa’ailoa manino mai e le Matagaluega o le vaega 15 tausaga e agai atu i le 35 tausaga le matutua o lo’o mafuli ai i latou o lo’o a’afia. Ua fa’amaonia fo’i e le Matāgaluega o le Soifua Mālōlōina e 16,842 su’ega (RAT Tests) sa faia talu mai le aso na mua’i pepesi ai tua le fa’ama’i.
