Ua faalauiloa i le asō e le NZ Rugby ua o latou ioeina le talosaga a le tamaitai taalo o Tyla Nathan Wong ina ia faamatuu o ia e tulituliloa se tasi o ana moemitiga.
Ua lipotia i le One News i le asō se faatalanoaga ma le tamaitai taalo ua ia ta’ua ai lona fiafia tele ina ua tuuina ane lea faatagana o le a agai ai i Ausetalia mo nisi faamoemoega tau taaloga lava i le lakapi liki a tamaitai Ausetalia.
O Tyla ua 26 tausaga o lona soifua, sa muai ulufale i le Black Ferns Sevens i le 2012 ae faatoa 18 ona tausaga.
Fai mai le faiaoga o le Black Ferns Sevens o Cory Sweeney, o Tyla sa avea ma se vaega tele o le latou ‘au ma e faamanuia i ana taumafaiga o le a aga atu iai.
Na faailoa foi e le pule o le NZ Rugby, Chris Lendrum ua faaauau pea le siitia o le numera o avanoa mo tamaitai i le lakapi faapolofesa e pei foi ona faia e isi tamaitai taaalo talu ai nei o Ruby Tui ma Sarah Hirini.
