O auaunaga tuma’oti e lē o ni itutino o le Malo, ae o loo faia galuega fesoasoani mo i latou e iai aafiaga o le mafaufau, fesoasoani i mana’oga lautele, ma le faia o polokalame faalauiloa e togafiti ai le gasegase o le kanesa, ua faamatuu iai e le Malo i le Tala Autu o le Tupe mo le tausaga faaletupe fou 2023 i le 2024 vaega tupe tai selau afe tala mo le faatinoina o a latou auaunaga.
O auaunaga tuma’oti ia e pei o le Goshen Trust, Koluse Mumu, sosaiete o le kanesa, ma le Matuaileoo poo le METI.
O le vaegatupe e 146 miliona, 544 afe ma le 809 tala ua faatatauina mo le Matagaluega o le Soifua Maloloina ua aiaia ai ia fesoasoani tupe tai selau afe mo ia auaunaga tuma’oti e lima.
Ua molimauina foi i le tala autu o le tupe ua mae’a ona faataatia e le Minisita o Tupe i le laulau a fono a le Palemene i le Aso Lua o lenei vaiaso, nisi fesoasoani ua aiaia i le auaunaga a le Matagaluega o Tina ma Tamaitai Atina’e o Afioaga ma Aga Fesootai, se vaegatupe e lima selau afe tala o le a fesoasoani ai i polokalame o loo faatinoina e nisi faalapotopotoga tuma’oti ma le faalapotopotoga o le Toomaga mo ē Puapuagatia o se isi foi auaunaga tuma’oti i le atunuu.
E ese mai ai le selau afe tala mo polokalame e taofia ai sauaga faasaga i tina ma tamaitai o loo faatino e nisi o auaunaga tuma’oti.
O nisi foi auaunaga tuma’oti ua afea i le faasoa o le tala autu o le tupe fou o nofoaga o tina ma tamā matutua i Mapuifagalele e 50 afe tala, ma le nofoaga o Mapuipulotu i le tatou motu o Savaii e 20 afe tala.
I se isi vaaiga i le faasoa a le Malo i lana fuafuaga fou o le atina’e o le tamaoaiga e ala mai i le tala autu fou o le tupe, e 500 afe ua aiaia mo le faaauauina o le fesoasoani o le fausia o fale nofo mo ē lima vaivai o loo faatino e le faalapotopotoga tuma’oti o le ADRA o se auaunaga a le Ekalesia Asofitu o le toe afio mai.
