O se tinā ua 72 tausaga o lona soifua ua na faamatala mai i se feiloa’iga i le Aso Gafua lona fefe ma mata’u ina ua faafuase’i ona ulufale atu ni leoleo se to’alua e tofu ma laaumalosi, a o fai le latou taaloga bingo ma faalālā atu laaumalosi ma faatonu uma i latou sa iai e punonou uma i lalo.

Na faaalia e lea tinā matua sa iai nisi o tinā ma latou fanau laiti a lo latou pitonuu i le taimi na faatino ai lea galuega a malu o le malo.

E pei ona silafia o le pitonuu o Leonē sa alu iai le osofa’iga a leoleo i le afiafi o le Aso Faraile na te’a nei, ma o le fale o lea tinā o le a lē faailoaina le suafa na afea i le galuega a malu o le malo.

Peita’i na faailoa e le tinā ma lona alo teine sa talanoa mai, e leai ni fualaau faasāina na maua i lo latou fale.

Na o la faailoa foi sa su’e foi nisi o fale ma maua iai le aisa ma ni laau faasāina o le maruana faapea ma ni laaumalosi o ni fana laiti.

Ua feagai nei se ofisa loia ma le tapenaina o se tagi a le tinā ma lona aiga faasaga i le galuega a leoleo ma ua tuua’ia ai le lē tuuina atu o le pepa faataga e silafia ai e le tinā o le a su’eina lona fale. 

E to’alima na taofia e leoleo i le Aso Faraile na alu ai le osofa’iga i Leonē, ae o se isi lipoti ua faailoa ai e to’afā ua molia.

O le isi to’atasi o se tamaitai na toe tatala i le po o le Aso Faraile.

E le’i manuia sa’iliga i se finagalo o le Komesina o leoleo, ae o le tausaga e 2015 na tula’i mai ai foi se matāupu faapenei na tuua’ia ai foi le galuega a leoleo na sa’ili ai le fale ma le fanua o se aiga i Tiavi lea sa faaa’upegaina foi leoleo i le faatinoga o lea gaioiga.

O se su’esu’ega a le ofisa o le Komesina o Sulufa’iga na faia i lea matāupu na fautuaina ai le matāgaluega o leoleo i sana lipoti i le tausaga e 2017, ina ia fetuutuna’i le faatinoga o le latou galuega i se osofa’iga tau fualaau faasāina, pe tatau ona faaaogā ni a’upega poo se isi faiga pe afai o se nofoaga o loo masalomia o loo iai ni fanauiti.