O loo fesiligia e nisi o le au faitulafono a Peretania pe talafeagai ona faaauau pea le faigāmalaga a Tupu Salesa i Amerika ae o loo iai sina tulaga lē lelei i le va o Trump ma Peretania i le matāupu lea i le taua i Iran.
Ua faailoa e le CNN e ui e lē o faamaonia pe taunuu lea faigāmalaga ae sa ta’ua le malaga lea e aga’i ane ai Salesa i Amerika i le masina fou e faamanatu ai ma le 250 tausaga o le tuto’atasi o Amerika.
Saunoa se tasi sui o le Palemene i le vaega faaupufai a le Leipa a Peretania, e lē manana’o e faamāina le latou Tupu ma e tatau lava ona manatunatu ma le toto’a i lenei matāupu pe talafeagai ae manatu ia e saogalemu lava pe a toe faatuai teisi.
O tulaga lē lelei i le va o Trump ma Kier Starmer le Palemia o Peretania na amata mai lava ina ua musu Starmer e faamatuu ane nofoaga faamiliteli a lona atunuu e fesoasoani ai ia Amerika ina ua amata le taua i Iran, lea e manatu Starmer e solitulafono lea gaioiga a Amerika.
Talu mai lava la le taimi lea na amata faalumaluma ai e Trump faamatalaga a Starmer fai mai e ofo atu e fesoasoani ae lē o lava ana gaioiga faatino.
Puna o Faamatalaga: https://edition.cnn.com/2026/03/18/europe/trump-king-charles-visit-iran-intl
