Ua faamaonia e le Auaunaga o le Soifua Mālōlōina, le faaopoopo ai o le numera o tagata ua aafia i le faama’i o le misela i totonu o Aotearoa nei, e pei ona māua le to’alima.
Ma ua oo mai ai le aofa’iga o tagata ua faamauina le mama’i ma maua i le misela i le 27, talu mai le aso 8 o le masina o Oketopa.
I lipoti e faapea, mai le 22 o i latou nei, ua lē o toe iai i se tulaga e ono pesia ai se isi uso a tagata mai ia i latou (no longer infectious).
Ta’ua o le tasi o lenei to’alima e aumau i Dunedin, o le isi i Waikato ma le to’atolu e i totonu o Aukilani.
Faaalia ai nei le faatupula’ia o popolega o le to’atele o sui o le soifua mālōlōina i le maualuga o le avanoa e pepesi ai le misela i le to’atele, aemaise o lea ua aga’i atu Ie atunuu i le vaitau māfanafana, ae o le tele o fuafuaga o faigāmālōlōga, o faigāmalaga e asiasia aiga i atunuu i fafo.
Ua fautuaina malosi tagata lautele ina ia taga’i ma silasila i le tulaga o iai a latou tuipuipui ma ia vave fai loa tui o le MMR vaccine, ma ia taga’i e fai tuipuipui i le 2 vaiaso a o lumana’i ai faigāmalaga mo atunuu i fafo.
Ta’ua e le Soifua Mālōlōina, e ono faaopoopo pea le numera o ē aafia ma maua i le faama’i a o faasolo ai pea sa’ili’iliga a sui i vaega uma o le maua ai o tagata lautele i le misela, aemaise le sa’ili’ili toto’a i nofoaga ua māta’itūina nei, o itu na lotolotoi ai i latou nei ua aafia.
E tusa ai ma faamaumauga, o le 2 o tuipuipui e faia i le atoa ai o le 12 o masina o le tamaitiiti; e au lava i le 99 pasene le tulaga o le malutia ma le puipuia mai le faama’i.
Ua fautuaina, soo se tasi lava ua amata ona faalogoina ma vaaia āuga o le misela e pei o le maualuga o le fiva, tale, mūmū ma le tagi o mata, faapea le pata o le tino; ia vave faafesoota’i atu le numera o le soifua mālōlōina – le healthline poo le foma’i masani mo se fesoasoani.
Puna o Faamatalaga: https://www.rnz.co.nz/news/national/580795/paediatrician-worries-new-measles-wave-spreading-undetected
