Ua faailoa lautele ai nei i le upega tafa’ilagi o loo faasalalau ai faai’uga a le faamasinoga a Samoa, le faai’uga a le Faamasinoga Faaitumalo na fofogaina ia Tesema o le tausaga na te’a nei, ua faamaonia ai le moliaga sa tuua’ia ai se alii sa galue o se leoleo o le malo, o lona faia o se faamatalaga sesē ua afaina ai le tulaga ta’uleleia o se tamālii sa avea ma faipule o le Palemene lea sa tauaveina ai tiute o le tofiga sui Fofoga Fetalai.
O le matāupu tau faamasinoga lenei na amata ona su’esu’eina e leoleo i le tausaga e 2021 ae o le tausaga na sosoo ai 2022 na amata ona tagofia ai i su’esu’ega a le Faamasinoga Faaitumalo, ae aumai le faai’uga ia Tesema o le tausaga ua mavae 2025.
O Paepaetele Ernest Junior Betham poo Faasavalu Ernest Junior Betham na molia e leoleo ina ua faaulu le tagi a Nafoitoa Talaimanu Keti, e mafua i ni tala sa faasalalau e lē ua molia i le polokalame o le Lauao Sinasina a le faletelevise o le EFKSTV i le aso 29 o Mati o le tausaga e 2021.
O se tala na tuua’ia ai lē na tagi i se gaioiga faamalosi na ia faia i se tama’ita’i leoleo.
O le isi moliaga a leoleo o le faalavelave o lē ua molia i le latou galuega a o aga’i leoleo e sa’ili mo le faia o su’esu’ega.
O mau a leoleo na talia ai e le faamasinoga le avea o se ata video mai le polokalame na faia ai tala sesē e avea o se vaega tāua o su’esu’ega.
Peita’i sa matuā teena e le loia a lē ua molia i le finauga o se mau e faavae i ni tala faalogo ma o se isi lea o finauga na su’esu’eina ma aumai ai le faai’uga e talia le faaaogāina e leoleo o lea video o le polokalame e avea ma ana mau autū.
I le lavelave o vaega o tulafono sa finauina ai e leoleo ma le loia a lē sa molia le moliaga o le faia o tala sesē ua aafia ai le tulaga ta’uleleia o lē na faatūtū iai faamatalaga, ua faamaonia le moliaga e aunoa ma ni masalosaloga tatau.
O le moliaga o le faalavelave i le tiute o leoleo ua lē mafai e leoleo ona faamaonia.
Ua aumai se faamaulaloga a le afioga i le Faamasino le afioga Loau Donald Kerslake i le umi ona faatali lana faai’uga ona e fetaui le taimi o su’esu’ega o molimau ia Mati o le tausaga e 2022 ma vavao o puipuiga o le faama’i Koviti-19.
Faaopoopo iai ma le tele o isi matāupu tau faamasinoga sa tagofia ma māfua ai ona faato’ā aumai le faai’uga o le matāupu tau faamasinoga i le masina faai’u o le tausaga na te’a nei.
O le faasalaga ua faia mo Paepaetele Ernest Junior Betham ua faatonuina na te totogi i le faamasinoga le sala tupe e tasi le afe lima selau tālā.
