O le vaeluaga o le po nanei o le Aso Gafua, 31 o Mati 2025 se’ia oo i le vaeluaga o le po o le Aso Lua, 29 o Aperila 2025, o le a amata faamamaluina ai le Poloa’iga mo Faalavelave Faafuase’i (Proclamation of Emergency) e tusa ai ma le Mataupu 105 o le Faavae o le Malo Tutoatasi o Samoa 1960.

O le asō, Aso Gafua, 31 o Mati, i le feiloa’iga a le afioga i le Tamaitai Palemia ma le autusitala, sa faalauiloa faalaua’itele mai ai lea faasilasilaga, e pei ona ua faamaonia mai e lana Afioga i le Ao Mamalu o le Malo o Samoa.

O le faai’uga o le vaiaso talu ai na laumanu’ia mai ai lenei fuafuaga a le malo e pei ona iai se lipoti a nisi nusipepa faasalalau ae o le taeao nei la i lea feiloa’iga faapitoa a le Ta’ita’i o le malo ma le autusitala na faato’ā faalauiloa aloa’ia ai loa lenei fuafuaga.

O le faia ai o lea faai’uga a le Kapeneta e faamauina ai i se tulaga aloa’ia le iai o le motu o Upolu i ni tulaga ma’ale’ale poo le State of Emergency e mafua i le faaletonu o le eletise ma faasoasoa ai lea auaunaga mana’omia tele e tagata ma pisinisi.

Mo le silafia o le taimi mulimuli na iai Samoa i se tulaga faapea o le taimi o le pipisi o le faama’i Koviti-19.

O le a toe faalauiloa atili atu i se lipoti mai Samoa le atoaga o lenei faalauiloaga mai le tamaitai Palemia, Afioga Fiame Naomi Mataafa.