O le alo o le atunuu ua iloga i le taaloga o le lakapi lea ua faamaonia lona sainia ai o se konekarate e taalo ai mo le Moana Pasefika i le isi taamilosaga tele a le Super Pacific Rugby i le tausaga fou.
O Christian ua 34 tausaga le matua ma na taalo i le au tele a Ausetalia le Wallabies mai le tausaga e 2013 ma le 2019. Na iloga foi lana taalo i le au a le Brumbies mai le 2008 ma le 2019 ma e silia ma le 150 taimi na taalo ai i le Super Rugby.
I le tausaga e 2016 na maua ai o se ia i se faama’i tūga tele le Leukemia, ina ua maea se taotoga tele na faia mo ia na toe foi ai i le Super Rugby i le tausaga e sosoo ai. Na toe foi e taalo mo le Wallabies i le tausaga e 2019 ma maua ai lona avanoa i le Ipu o le lalolagi Na faia i Iapani lea na taalo ai mo taaloga e 4.
O le filifilia ai o Christian i le au a le Moana Pasefika na ia taua o se avanoa taua mo ia ma na te faafetaia mo le avanoa faaauro ua tuuina atu ia te ia. Na ia taua foi e tele le taua o Le taalo ai i se au e faatauaina lona faasinomaga ma lana aganuu. Na faafeiloai aloaia e le Moana Pasefika le susuga ia Christian ma na taua e le faiaoga Aaron Mauger o le agavaa ma le malosiaga o Christian i le taaloga lakapi na manino ai lona avanoa e taalo ai i le Super Rugby i lalo o le Moana Pasefika.
O le a malaga mai Christian i Niu Sila i se taimi o le tausaga nei e auai faatasi ai ma le au atoa aua toleniga ma tapenaga mo le Super Rugby Pacific competition.
