O le aso 1 o Aokuso o le tausaga nei o le a tuua ai e le Palemia o le malo o Niu Sila Jacinda Ardern laufanua o Aoteroa ae malaga atu i Samoa mo le aso e tasi.
O lea faigamalaga o se vaega o le faamanatuina o le 60 tausaga o le maliega poo le Treaty of Friendship i le va o atunuu e lua lea na sainia i le tausaga e 1962.
Na faamaonia mai lea vaega tāua e le feiloaiga a tusitala ma le tamaitai palemia o Samoa Fiame Naomi Mataafa i le vaiaso nei.
Ta’ua e le Sa’ofaapito, “O le a taunuu mai faaaoauli le vaa e malaga mai ai le tamaitai Palemia ma lana aumalaga e aumai e le vaalele a le malo. E lē umi le latou malaga e toe foi i le aoauli agai i le afiafi o le aso 2. E amata i le afiafi i le ‘ava o le feiloaiga e fai i Vailima ona fai ai lea o se talimalo a tatou na oo loa lea i le aso lona lua, e amata lava i le feiloa’iga a le Tamaitai Palemia ma le Ao o le Malo, o se courtesy call mo le Ao o le Malo ona fai ai lea o le sauniga faalemalo i luma o le fale o le malo mo le guard of honor e tatou te faaaloalogia ai foi le afio mai o le Tamaitai Palemia aemaise o le faailogaina lea o le tatou Treaty e lē gata e fai ai le guard of honor e fai ai ma le sauniga o le sisiina o tatou fu’a, fu’a a Niu Sila ma le fu’a a tatou e tusa ai ma le feagaiga lea faauo a malo e lua. Ona sosoo ai lea ma le feiloaiga a Minisita a Niu Sila ma le Kapeneta a Samoa auā lea e malaga mai le Palemia ma ana Minisita ona fai ai lea o le feiloaiga ma le aufaasalalau, ona faamavae ai lea, e puupuu lava le faigamalaga.”
Ina ua fesiligia le afioga i le Palemia ia Fiame poo le ā se ‘ai mo Samoa i le malaga atu ai o le Palemia o Niu Sila mo lea maliega faauō ae na tali Fiame e faato’ā iloa pe a taunuu atu le malaga poo ā ni vaega o le a talanoaina i lenei feiloa’iga faalemalo.
