Ua faailoa mai e le sui faipule o Aana Alofi 2 o le Minisita o le Matāgaluega o A’oga ma Aganuu, le tuuina atu i leoleo o lana tagi faasaga i le ta’ita’i o le vaega e puipuia aiā tatau a tagata o le ta’ita’i o le Itu Agai susuga Tuilaepa L Sailele Malielegaoi.
Sa fesoota’i atu i le Minisita i le afiafi o le Aso Lua e ala i auala o fesoota’iga televavave, ma tāpā ai sona finagalo ina ua lipotia i le Aso Lua lava o lenei vaiaso le gaioiga a leoleo o le a faia ai moliaga o le susuga Tuilaepa i solitulafono o lona faia o ni lafoga taufaaleaga i le sui faipule o Aana 2.
O ia tala taufaaleaga i se faatalanoaga a le ta’ita’i o le Itu Agai i auala o fesoota’iga a lana patī faaupufai i luga o upega tafa’ilagi i le tausaga ua mavae, na ia tuua’ia ai Aiono Alec Ekeroma a o avea ma Faatonu Sili ma faauluuluga o le Matāgaluega o le Soifua Mālōlōina, i lona faaaogā o vailaau faafoma’i mai le matāgaluega e togafiti ai gasegase i lana pisinisi o se falema’i tuma’oti.
I le finagalo o Aiono ina ua fesoota’i iai, o loo ia teena ai ia tuua’iga ma o le māfua’aga lea o lona tuuina atu i leoleo o lana tagi.
E le’i manuia sa’iliga i le Komesina o leoleo, falepuipui ma le toe fuata’ina i se faamaoniga o le gaioiga o le a molia ai le ta’ita’i o le vaega faaupufai e puipuia aiā tatau a tagata i moliaga o le faia o tala taufaaleaga i le Minisita o A’oga ma Aganuu.
O loo molia le faipule o Lepa ma le ta’ita’i o le vaega faaupufai e puipuia aiā tatau a tagata i aiaiga o le tulafono o soligatulafono lea o loo aiaia ai o se solitulafono le faia o ni tala ma faasalalauga taufaaleaga.
O se aiaiga i lea tulafono na aveesea i le tausaga e 2013 ae na toe faaofi e le faigāmalo a Tuilaepa i le masina o Tesema o le tausaga e 2017 ona o le tele o faasalalauga taufaaleaga i le malo i lea vaitau mai le fesoota’iga i luga o le api o foliga sa faaigoa O le Palemia.
