O se tama aoga Samoa ua filifilia nei i le polokalame faasaienisi tau komepiuta, computer science program a le NASA. O ia lea o Chester Leoso o se tama aoga i le Leeward Community College i Honolulu ma ua ta’ua e le RNZ Pacific ua filifilia Chester mai le silia ma le 5 afe o ē na talosaga.
E na o le 147 i latou ua taliaina i le polokalame lea ma e na o Chester le tama aoga mai Hawaii. O le polokalame e talimalo ai le Oklahoma State University e faia i tausaga uma ma e maua ai avanoa o sootaga i totonu o lenei auaunaga tāua a Amerika ma maua ai galuega.
O le masina o Me o le tausaga fou e tatau ona faauu ai Chester ma ua fuafua e faalautele ai lona tomai i le auaunaga lea tau computer science a o le’i aga’i e faigaluega ai. O le NASA, National Aeronautics and Space Administration, o se ofisa o le malo tele o Amerika e feagai ma mataupu tau saienisi ma faatekonolosi e aofia ai le ea ma le vateatea.
