O le masina fou o le a malaga ai le uluai tamaitai mai le atunuu mo galuega i luga o vaa la’u pasese i atunuu i fafo o le isi lea tulaga o loo tagatagai iai le kamupani vaa a le atunuu ia tele ni avanoa o tamatai talavou a Samoa e galulue i luga o vaa tetele.
Na faailoa e le Ofisa Sili o le Kamupani Vaa a le atunuu ia Lautimuia Afoa Uelese Vaai ia laasaga ua ausia mo ia galuega i se faatalanoaga ma nisi o le au tusitala.
“O le tamaitai la lea o lea e fuafua o lea e faatalanoa i le taimi nei e faigaluega i le hotel department o le vaa e le faigaluega i le deck le mea lea e iai tatou tama lea e oatu faigaluega ai a’o le hotel department. Ua leva na tatou tu’itu’i i le mea lea e tatala mai le mea lea mo tatou tamaitai, ma o le toatele foi o tatou tamaitai ia e talosaga mai e le fia faigaluega i le hotele fia faigaluega i le galuega a faaseila i le deck lea la e talosaga le tatou kamupani ina ia tatala mai le avanoa mo tatou tamaitai e faigaluega ai luga o le deck”,
E pei ona silafia o lea ua toe fa masina ona atoa lea ia Iuni o le tausaga nei le 12 masina talu ona toe malaga alo ma fanau o le atunuu ua talia i galuega faaseila i luga o vaa la’uoloa faapea meli la’u pasese i Europa talu ona toe taliu atu nisi i Samoa ona iai aafiaga ona o le Koviti19.
Faailoa foi e Lautimuia o loo iai le filiiflia ma le pulea o alii vaa o loo malaga mo ia galuega ua tele avanoa ua ofo atu e le gata o le Kamupani a le Mediterranean Shipping Company le MSC ae faapea foi isi kamupani vaa i fafo.
