O le auaunaga lelei i kamupani vaalele poo le Best Airline Staff Service i totonu o Ausetalia ma le Pasefika ua faamanuiaina ai le kamupani vaalele a le Fiji Airways. 

I se tufatufaga faailoga na faia i le faaiuga o le vaiaso i Langham Hotel i Lonetona na tauaao ai loa lea faailoga i le sui o le kamupani vaalele. O le taimi lona lua lenei ua filifilia ai e tagata malaga le kamupani vaalele a le Fiji Airways talu mai le taimi muamua i le tausaga e 2019. 

Faailoa e le pule o le Fiji Airways Mr Andre Viljoen o le agaga faafetai ma le faagaeetia ona o le faaeaea ua tuuina atu ma ua mautinoa ai o loo sologa lelei faatinoga o le auaunaga a le aufaigaluega. 

O le taimi nei o loo ave le faamuamua a le kamupani vaalele ia latou fuafuaga tetele mo le saga faaleleia ai o le auaunaga e tuu atu i tagata malaga e le gata i totonu o Fiti ae faapea nisi faigamalaga e faaaogaina le latou auaunaga.