Ua maua e le kamupani vaalele a le atunuu le Ea Niu Sila le faailoga o le Crystal Cabin Awards i Hamburg i Siamani.
O se tasi lenei o faailoga sa aofia i le sauniga e tauaao ai ia foi faamanuiaga i Siamani i le po anapo ma ua manumalo le Ea Niu Sila i le vaega poo le category o Cabin awards ona o lana fuafuaga i le SkyNest, le auaunaga lea e mafai ai ona faaaoga e le pasese se moega i le taimi o faigamalaga uumi.
E le gata i lea ae ua manumalo foi i le Onboard Hospitality Cabin Concept of the year ona o lana polokalame e faaigoa o le Future Aircraft Cabin Experience.
E faaopopo atu ia faailoga i le tulaga ua faaigoa ai foi le Ea Niu Sila o le kamupani vaalele aupito sili ona lelei i le lalolagi, world’s best airline e le auaunaga a le AirlineRatings.com lea latou te faatusatusa tautua a kamupani vaalele i le lalolagi.
Na saunoa le faauluuluga o polokalame tau vaalele a le kamupani o Kerry Reeves, o se taimi aupito tāua mo le kamupani ma o le faalauteleina o le tautua e ala i le SkyNest o se galuega lava o le alofa, ma ua fuafua e amata faaaoga ia Setema 2024 i faigamalaga i le va o Aukilani ma Niu Ioka ma le va o Aukilani ma Chicago i Amerika.
