O ia o le Tupu o le Malo tele o Peletania ae o le Faaao o Malo o le Taupulega le afioga i lana Maiesetete Salesa III, ua aumai faatasi ma lana Masiofo o Camilla le feau faamanuia i le afioga i le Ao o le Malo le afioga Tuimalealiifano Vaaleto’a Sualauvi II, i le faamanatuina o le tatou Malo Tutoatasi ua atoa le 62 tausaga.
O le Aso Toonai le aso muamua o Iuni na faailoa ai e le Ofisa o le Komesina Maualuga o le Malo o Peletania i Samoa le feau faamanuia mai lana Maiesetete, ua momoli mai ai ona alofaaga ma moomooga lelei, i le faamanatuina o le Tutoatasi o Samoa.
Ua aumai ai ma lagona fiafia o le Tupu i le avea ai o Samoa ma se tasi o Malo o le Taupulega o loo taulamua i le faatāua o polokalame e tetee atu ai i suiga tetele o le tau.
O loo silasila mamao foi le Tupu o Salesa III i le taligamalo a Samoa i le fono a Malo o le Taupulega o le a sasaa ai finagalo o taitai o malo i mataupu mo le manuia o atunuu o loo i le li’o o Malo o le Taupulega.
O le Aso Gafua le amataga o lenei vaiaso ua faamanatu ai e le tatou Malo ma le atunuu le 62 tausaga o le tatou Tutoatasi e pei ona faagasolo polokalame masani i le Malae o Tiafau i Mulinuu.
O polokalame o le Tutoatasi na amata i le sauniga faafetai na faia i le malumalu o le Ekalesia Katoliko i Mulivai i Apia ma sa tapenaina le polokalame e le Fono a Ekalesia Soofaatasi.
I le atoaga lava o tausaga e 62 talu ona maua le Malo tuma’oti o Samoa mai pulega faakolone a isi Malo, o le Aso Toonai na tea nei le aso muamua o Iuni, na faamanatu ai e le afioaga o Vaimoso le Tutoatasi e ala ia latou polokalame e pei o solo faaaloalo ma faafiafiaga, sa faia i luma ane o le nofoaga o loo iai le Maota o le Mau, o se pine faamau matamata tetele o talafaasolopito o sailiga malo a Samoa.
