Ua faailoa e le minisita o faamasinoga a Niu Sila o Paul Goldsmith i Malo Aufaatasi o Niu Sila o loo maumaua’i i le faamautinoaina e faaitiitia le aofai o tagata e aafia i soligatulafono e aofia ai sauaga a o lei oo i le 2029.
O loo lipotia i le One News i le asō i se pepa o faamatalaga na ta’ua ai e Goldsmith o le talanoa atu i le Pulega mo Aiātatau a Malo Aufaatasi le United Nations Human Rights Council ua maua ai le avanoa e faasoa ai le faagasologa ma mea o loo ave iai le faamuamua faapea foi ma lu’itau, ma tali atu foi i isi mataupu e pei ona lāgā e nisi.
Fai mai lipoti o le tele o isi finagalo faaalia mai sui o isi atunuu ua fautuaina ai Niu Sila ina ia faaopoopo gaioiga e faia e faaitiitia ai nisi o tulaga e lē o ogatusa mo tagata Maoli e pei o mataupu tau le soifua maloloina, aoaoga ma faamasinoga.
Ua fautuaina foi e Ausetalia ni faiga i pisinisi e faatatau i totogi.
O le isi faamatalaga a Goldsmith ua ta’ua i le lipoti e faapea o Niu Sila e lē o toe sefe e pei ona iai i le ono tausaga talu ai, ma ua lē o le atunuu na soifua ane ai le toatele o i latou.
O loo iai nei le minisita i Geneva i le fonotaga o loo faamanino ai fuafuaga a le faigamalo a Niu Sila le soofaatasi i mataupu tau le tulafono ma le nofolelei.
Puna o Faamatalaga: https://www.1news.co.nz/2024/04/30/paul-goldsmith-tells-un-of-nzs-commitments-on-violent-crime
