O se faiga lenei ua faatino ai le faamanatuina o le aso e faailoga ma faapitoa mo faiaoga uma i le atunuu e felafolafoai ai Upolu ma Savaii e faatino ai se polokalame e faamanatu ai le auaunaga a faiaoga uma i le atunuu.

O le tausaga lenei ua faatino ai i le motu tele i Salafai lenei aso faapitoa ma o loo masii ai le tele o faiaoga a le Malo o loo galulue i aoga i Upolu mo lenei faamoemoe.

Na saunoa ai le Afioga i le Minisita o Aoga, Seuula Ioane Tuaau e tuuina ai se matūpalapala e amanaia ai le tautua a faiaoga e ala i le aotauina o alo ma fanau a le atunuu.

“O se mitamitaga tele foi lea ina ua vaai atu o maopoopo mai faiaoga aiga o asiasi aoga e mamalu ma maualuga ai le faamanatuina o lenei aso aemaise le polokalame mo outou faiaoga.

“O le faamanatu i faiaoga o oe o le puna o manuia o le atunuu, Ekalesia ma aiga ia faatāua lou soifua maloloina o le mafaufau tino ma le agaga ina ia tamaoaiga ou faiva ma faataumuaava lo tatou sa i suega faaiu o lenei tausaga.

“O le tatalo ia faamanuia mai le Atua ia outou faamoemoega uma ae o le aso ia taaalo faatausala ma faatamalii ia viia ai le Atua.”