O le tausaga nei e atoa iai le 65 tausaga talu ona faavae mai le Kolisi maualuga o Sagata Maria i Vaimoso a le Ekalesia Katoliko ma na tatala aloaia i le Aso Sa 7 o Novema lenei matatia taua.
I le tausaga e 1956 na amatalia ma faatu ai lenei aoga a le Ekalesia i Samoa ma i le faamanatuina o nei tausaga e tele ua omai faatasi teine tuai e lē gata i Samoa ae faapea le lalolagi atoa e patipatia lenei faamoemoe taua.
O fuafuaga a teine tuai poo le SMOGA mo se latou fesoasoani i le aoga na faafaileleina o latou olaga faaleaoaoga ua faatupe faatasi e le Asosi le fausia ai o se fale taalo mo alo ma fanau o loo aoaoina i le Kolisi i le taimi nei.
Taua e le Peresetene o le Asosi o Teine Tuai o le atinae fou e ala i se fale taalo netipolo mo tamaitai aoga o loo faia i le nofoaga tuai sa iai malae taalo a le Kolisi ma o le naunautaiga ina ia maua e latou meafaigaluega talafeagai mo taaloga.
O le Kolisi o Sagata Maria i Vaimoso o se tasi o aoga na faavae mai e Tamaitai Sa o le SMSM ma o le ulutala o le faaamanatuina o le 65 tausaga ua faaupuina “Celebrating the work of the SMSM Sisters” poo le faataua o le galuega a Tamaitai Sā SMSM.
E 19 le aofai atoa o Aoga a le Ekalesia na faavae mai e le SMSM ma ua maea ona tapena se polokalame faasolo a le Kolisi mo le masina atoa o Novema mo lea faamoemoe. O le taimi nei ua ave le tepataulai ma le faamuamua a le SMSM i aoga e lua o loo o i lalo pea o le vaavaaiga a Tamaitai Sa, le Kolisi o Sagata Maria i Vaimoso faapea le Aoga Sagata Maria i Savalalo.
