O le tasi o mataupu na faailoa e le afioga i le Ofisa Sili o le Kamupani Vaa a le atunuu ia Lautimuia Afoa Uelese Vaai o le faamalolo o nisi o seila e silia ma le to’a 10 mai le atunuu ma ua toe faafoi atu i Samoa ona o aafiaga i le amio. 

“E tasi lea vaega o lea tilotilo iai le tatou kamupani i le toe tapenaina o tamaiti nei. Manatua foi o le toatele o tamaiti nei e i le va o le 18-25 tausaga le matutua ma o le toatele o tamaiti nei o le taimi muamua lenei faatoa oese atu ai ma Samoa, pe faatoa ese atu ai ma o latou aiga. O le tulaga foi la lea e iai e le’o oatu o i Niu Sila poo Ausetalia poo le mea lea e masani ai tatou e toatele tagata Samoa, o lea e o i le lalolagi tele e matuai ese a le siosioamga lea e faigaluega ai”. 

Taua foi e Lautimuia o le tasi la lenei vaega e taua le vaai toto’a iai o le kamupani ae le gata i lea e tatau ona amata mai lava i aoga lea e iai e le gata o le aoaoina o mataupu ao tulaga i le mafaufau e ala i gaioiga ma amio faaalia. 

E taua ai foi le galulue faatasi o vaega uma ia ina ia tapena lelei ai fanau mo le agai atu i ia galuega.