Ua faamaonia mai i ripoti a le leitio faavaomalo a Niu Sila, le faamalōlō ai nei e le auaunaga a leoleo nisi o sui, o malu o malo, ua māua lo latou fafau ai o ni faamaumauga lē sa’o o fua faatatau o le taumafaina o le ‘ava malosi e ave taavale alcohol breath tests.
Faamauina ua taunuu i lea faaiuga talu ai e lē na o le pau lea o gaioiga lē tautamalii ma aga tausili i le avea ai ma leoleo ua o latou faia.
I lea mataupu na faamauina ai, e lata i le 30,000 iloiloga o fua faatatau mo le ‘ava malosi na faatino, e lē sa’o pe faamau sesē e leoleo.
Ta’ua na faatoa iloa lava e le auaunaga nei faiga ina ua faatino se vaega fou o le faamaumauina o le maualuga o le malosi ua oo iai le onā o le tagata ave taavale, o se vaega na faatino e iloa tonu ma mata’ituina ai le mafuaaga ua tele ai mataupu e vaaia le lē fetaui o faamaumauga i le faia o iloiloga.
Ma i le alia’e mai ai o lenei faafitauli, o lea ua māua le faia o suesuega a leoleo iai latou o loo aafia i lenei mataupu e pei ona faaalia, e 120 sui o le auaunaga ua faia iai fuafuaga ona o le lē savalia o aiaiga ma ta’iala o le avea ai ma tagata faigaluega, ma isi ua mātuiā tele gaioiga.
Ae e ui i le lē uia o ta’iala e tusa ai ma le faatinoga o le galuega e lē o iai se tasi e ono molia i i moliaga tau soligatulafono.
Faamanino i ripoti, o isi o mataupu mātuiā o loo aofia ai le tagata e lē tasi, e lē lua foi taimi ua ia faia ai nei gaioiga, ae faapea foi le maua o loo iai ni sui sinia leoleo na o latou silafia ma iloa ia faatinoga.
Ua faamaonia mai poo 1/3 o mataupu ua mae’a iloiloga ma suesuega ma ua tuuina atu tusi e lapatai ai i latou, poo ua mae’a faatalanoaga e tusa ai ma laasaga o le galulue ai i le auaunaga a leoleo.
Faamanino e leoleo o le toatele o i latou ua tuuina atu ai tusi, ua talia lapatiga ua tuuina atu, ma faaalia ai sa lē tatau lava ona o latou faia ia gaioiga.
Puna o Faamatalaga: https://www.rnz.co.nz/news/national/579468/breath-test-investigation-small-number-of-police-officers-stood-down-for-additional-misconduct
