Ua faamalolo lē tumau mai lana galuega se tasi o fomai mai Aukilani ua lipotia i le asō i le One News e mafua ona o lona aumaia ma le fautuaina o fualaau e lē lesitalaina e pei o steroids e le o ioeina lona faaaogaina e tagata i Niu Sila.
Ua faailoa i le lipoti o le fomai e suafa ia Dr Christopher Paltridge sa ia faaaoga igoa ma tuatusi o gasegase e aofia ai ma se gasegase ua maliu e aumaia ai fualaau ia i le atunuu mo ana lava pisinisi.
Fai mai sa ia tusia foi talavai o fualaau i gasegase ae le o lava suesuega faatino ma tulaga tau faamaumauga o ia gasegase.
E ono masina ua faamalolo lē tumau ai ma faasala e totogi le 5 afe aemaise o le tau aofai e 35 afe ona o nisi moliaga e aofia ai le faatinoga o lana galuega i le NZ Men’s clinic mai le 2011-2017.
Fai mai na faia le faamasinoga o le mataupu lea i le 2022 ae o lea faatoa faailoa faalauaitele le iuga a le Health Practioners Disciplinary Tribunal ua faia i lea alii fomai.
