Ua aumai le faai’uga tusitusia a le faamasinoga o palota i le talosaga e ave i tua le tagi tau palota mai Falealili 1, ma ua faailoa ai le faamalieina o le faamasinoga i le tuua’iga e faapea sa aafia faiga faaālatua i le ave i tua o lea tagi, ona o le selau afe tālā na totogi e lē na tagi i lē sa molia le faipule lea o Falealili 1.
Ua faailoa i le faai’uga tusitusia na tuuina mai i le Aso Tofi o le vaiaso nei, o le lē tuuina atu e le loia a lē na tagi ma le loia a le faipule o ni mau e lu’i ai le tuua’iga na tuuina atu e le vaega faaupufai e puipuia aiā tatau a tagata, o le tasi lea o mau e talitonuina ai sa iai le fesoota’iga a lē na tagi ma lē na molia ina ia ave i tua a la moliaga sa lotolotoi ai ma le selau afe tālā.
O le māfua’aga lea na lē talia ai le ave i tua o le tagi ae faaauau.
Peita’i o le Aso Tofi na tuuina atu ai folasaga faai’u a loia sa autū i vaega e tolu sa aumai e le faamasinoga, e aofia ai le ono ave i le Loia Sili o tuua’iga o le tuuina atu o le selau afe tālā ma avanoa ai leoleo e faia se su’esu’ega, o le faalavelaveina o molimau lea e na o le to’atasi na oo atu i le Aso Gafua na faatulaga e su’esu’e ai molimau, ma le vaega lona tolu sa autū iai folasaga, o le faalēmigao i le faamasinoga o molimau na poloa’ina e oo atu i le faamasinoga.
Ua faailoa e le afioga i le Faamasino Sili o le a aumai se faai’uga a o le’i oo i le aso kilisimasi.
