Ua faamanino mai e lana afioga i le Minisita o Aoga Taaloga ma Aganuu susuga Seuula Ioane le numumi sa iai le faasilasilaga a le Matagaluega lea na fesiligia e le toatele i le vaiaso na tea nei.
O lea faasilasilaga na faasalalau i le maea ai o le saunoaga a le Palemia e toe a’e Aoga i le vaiaso nei ae sau le faasilasilaga a le Faatonu Sili ma le Matagaluega e tapunia pea Aoga mo le isi 2 vaiaso peitai na vave ona toe sui lea faasilasilaga.
Taua e Seuula i le Samoa Observer na talanoa ma le Faatonu Sili i le vaiaso nei e faatatau i lea mataupu ma ia taua ai ua faailoa atu e le tamaitai Faatonu Sili na fai lea faasilasilaga e fua agai le PK (Cabinet Paper) muamua ae lei faia leisi vaega fou i le Aso Faraile o le ala lea o le fenumia’i.
Taua foi e Seuula e iai uma a le sasi o le tagata ma e mafai ona toe iloilo ma faasa’o. Ina ua fesiligia i le tuualalo mai se tasi o Minisita o le Kapeneta ina ia faamavae le Faatonu Sili ae tali le Minisita e leai e faaauau pea galuega a le afioga Afamasaga Karoline Afamasaga, e iai foi le taimi e uma ai lana konekarate.
Ua fautuaina ai foi e le Minisita fanau aoga uma ina ia faaaoga lelei le avanoa i aoaoga mo so latou lumanai manuia.
