Ua fautuaina le Kapeneta e le sui Minisita o le Matagaluega o Pisinisi, Alamanuia ma Leipa i lana lipoti, ia faasala uma le aumalaga mo galuega faavaitaimi, na tuua Samoa i le aso 15 o Ianuari, e le toe maua ni avanoa mo ia galuega.
O i latou uma na tuua le atunuu i lea aumalaga mo se kamupani i Niu Sila o le a lē faailoaina le igoa, o loo faaalia i le lipoti a le Minisita e tusa o sailiiliga faalotoifale a le matagaluega, sa faailoa iai o loo taofia lē tumau malaga mo ia galuega, ae sa faaauau lava ona tapena ma agai i le malaevaalele ma faatofa mai, ina ua mae’a uma o latou pepa ma ua maua foi VISA o galuega faavaitaimi.
Ua fautuaina ai i le lipoti le tatau ona faasala ma lea kamupani ona sa logo iai le taofiga lē tumau, ae sa faaauau lava ona faia fesootaiga i le auina atu o lea aumalaga o tagata faigaluega faavaitaimi.
O le fono a taitai o Malo o le Pasefika o le a usuia i Fiti i le faaiuga o le vaiaso asau, o le a fofola ai e le Palemia o Samoa i luma o taitai o atunuu le tatau ona galulue faatasi e silasila totoa i le tele o faaletonu ma faafitauli ua aafia ai atunuu taitasi ona o aiaiga o ia galuega.
Le afioga i le tamaitai Palemia, afioga Fiame Naomi Mataafa, i lona finagalo tali, ina ua fesiligia i le tulaga o aiaiga fou o le a faaaoga e fili ai o tatou tagata e tatau ona agavaa mo galuega faavaitaimi.
