I le fā aso ma le ‘afa aso sa faagasolo ai taualumaga a le Faamasinoga Maualuga e su’esu’e moliaga o ni alii se to’alua e pei ona tuua’ia i lo la faia o ni gaioiga tau faiaiga i se tamaitai talavou e iai ona aafiaga tumau, ua faia le faai’uga a le faamasinoga e faalēaogā uma ia taualumaga sa su’esu’eina ai molimau a leoleo poo se mistrial, ona ua lē maua uma le tele o faamaumauga sa pu’eina ai e masini pu’eleo a le faamasinoga ia molimau tuu fofoga e aofia ai ma fesili a loia.
O lea mataupu sa lipotia i leoleo i le tausaga e 2019 ma faia ai su’esu’ega ma molia ia alii talavou e to’alua, peitai o le vaiaso na te’a nei na faato’ā valaau ai molimau.
I le faalēaogāina o ia taualumaga ua faaalia e le afioga i le tamaitai faamasino le afioga Leutele Mata Tuatagaloa i lana faai’uga, o le itu sili ona tāua ai faamaumauga ua lē maua, ona e faalagolago iai loia ia latou folasaga faai’u, ae tāua foi mo ia i lana iloiloga mo se faai’uga ina ia faia le amiotonu.
O le isi o itu tāua i faamaumauga ua lē maua ona o faaletonu i masini pu’eleo ona afai ae toe apili se faai’uga, o le a lē mafai e le faamasinoga o talosaga toe iloilo a le Faamasinoga Maualuga ona maua le atoaga o mau sa tuuina atu.
O le Aso Faraile na te’a nei sa tatau ona maua ai e loia faamaumauga tusitusia o molimau sa su’esu’eina poo transcript peitai o lea faaletonu ua lē mafai ai ona maua ia faamaumauga tusitusia mai le faamasinoga.
O le Aso Gafua a sau 31 o Mati o le a toe valaau ai lenei mataupu tau faamasinoga mo le faatulagaina ai o se isi aso e toe su’esu’e ai moliaga o alii talavou o loo tuua’ia.
Ua faaauau foi ona tatala ia alii i aiaiga o le saini i le ofisa o leoleo ma taofia pea o la tusifolau.
Ua faia le poloa’iga a le faamasinoga e tapu ona faailoa suafa o alii e to’alua ua molia, faapea lē na aafia poo le victim.
