Ua faalēaogāina e le ofisa o le vaaitau i Samoa fautuaga ma lapata’iga o galu fafati maualuluga, aemaise o le faalēaogā o fautuaga o lologa i nofoaga tu matafaga.
O le afiafi o le Aso Sa ua mavae atu nei na faalēaogā ai ia fautuaga ma mou ese ai popolega o tagata o loo alala i nofoaga maualalalo tu lata i le sami i vaega o le atunuu, sa molimauina le oo iai o le malosi o galu o le sami.
O ata pu’e a nisi mai ia nofoaga sa faapena ona faasalalau i fesoota’iga i le api o foliga sa mafai ona iloa ai aafiaga o meatotino e pei o nisi fale apitaga tu matafaga i nisi o matafaga i le atu Aleipata sa faaleagaina.
O Amerika Samoa faapea le Atu Kuki sa iai foi ia aafiaga ona o galu fafati maualuluga. Mo Samoa o loo faatumau pea lapata’iga mo ogasami, faapea fautuaga o savili malolosi ma timuga mamafa.
