Ua talafeauga le vaiaso o loo faamanatu ai e le Matagaluega o le Siosiomaga le tāua o le siosiomaga i le atunuu ma le faalauiloaina o le poloketi a le Pulega o Uafu ma Vaa a Samoa e lagolagoina ai taumafaiga a le Malo mo faatinoga e puipuia ai pea le siosiomaga.

I lenei faamoemoe na saunoa ai le Minisita o Galuega Tetele a le Malo, Afioga Olo Fiti Vaai e tusa ai o le faagaioina o lenei poloketi.

“O le Green Port Initiative Project o loo mafai ona fesoasoani mai ai le Faletupe o Asia e tauala mai i le poloketi mo le siitia o le saogalemu o Uafu a Samoa ma le galuega fai faatasi ma le Pulega o Uafu ma Vaa a le atunuu ma le Royal HaskoningDHV.

“O lenei poloketi o loo autu lea i le faaleleia i tulaga saogalemu e ala lea i faiga faavae ma faatinoga e ogatasi ma le puipuia ai o le siosiomaga e aofia ai le faaaogāina o malosiaga faafouina, tapenaga ma fuafuaga mo taimi o faalavelave faafuasei ma matuia ma le unaia pea o avanoa tutusa i auaunaga a le Pulega.”

O nei vaega uma o le poloketi o loo ogatasi lea ma fuafuaga faataatitia a le Vaega o Galuega Tetele 2023-2028.

“E oo mai i le taimi lenei o loo galulue vaega o feagai ma le poloketi i le faatinoina o vaega e 10 o lenei fesoasoani.

“O poloketi faapenei o loo atagia ai la tatou pitolaau i taumafaiga a atunuu o le lalolagi i faatinoga eseese auā le tetee atu ai i suiga malosi o le tau.

“O nisi o vaega o lenei poloketi e aofia ai le vaega e tapue ai le suavai maua mai le timu, o vaega tau tapenaga o faalavelave faafuasei ma le amanaia lea o le tamaitai muamua ua tulai mai le tulaga Kapeteni i se tasi o vaa i le atunuu.”

Na faafetaia ai e le Minisita le Faletupe o Atinae a Asia mo lenei fesoasoani faatasi ai ma le Royal Haskoning.