O le laau o le ‘ava ua faamauina o se tasi o laau tau faatoaga i lo tatou atunuu e tele seleni e maua ai pe a lelei ona totō mai le amataga seia oo ina matua ma selesele.
E lē gata o le lelei o seleni e maua ai pe a faatau i le atunuu ma ave foi i maketi i fafo, ae o se laau e tāua tele ia tatou tu ma aganuu ona o le suā‘ava e feiloai ai Tupu o le atunuu aemaise o fesagaiga a faleupolu tofia pe a feiloai i malae ma maota tausi o Samoa.
O le mafuaaga lea ua ave ai nei le faatāua a le Malo e ala mai i le Matagaluega o Faatoaga ma Faigafaiva i le aoaoina lelei o le au faifaatoaga ‘ava, i taiala e totō ma atina’e ai lea laau tau faatoaga.
O se aoaoga o loo fesoasoani tele iai Malo o Niu Sila ma Ausetalia.
Le Minisita o Faatoaga ma Faigafaiva, susuga Laauli Leuatea Polataivao Fosi Schmidt i le tatalaina o le aoaoga ua tufa atu ai i le au faifaatoaga ‘ava taiala e atina’e ai lea laau tau faatoaga.
