O se tamafanau a Samoa na fofoa mai le Ekalesia Faapotopotoga Kerisiano Samoa lona olaga aoaoina e le gata i le kolisi i Leulumoega Fou, ae o le kolisi faafaifeau i Malua le susuga i le faifeau Dr Apelu Po’e, ua mae’a sana galuega tāua o se tusi ua ia faamatala ai ana sailiiliga i le talitonuga faa-Kerisiano ma le anofale o le Tusi Paia Eperu.
Ua faaulutalaina lana tusi i le gagana peretania, “The Hidden Secrets of the Master’s Mind”.
Na maua lona avanoa e faalauiloa ai lana tusi i le mafutaga a faifeau EFKS a o usuia le fonotele i Malua i le vaiaso na tea nei, ae o loo iai lona naunautaiga e faalautele atu i tagata lana galuega.
O le susuga i le faifeau ia Dr Apelu Po’e ua umia le faailoga PhD mai le Iunivesite o Yale i Nashville i le setete o Tennessee i Amerika ma o loo faamautu ai foi ma lona aiga.
Sa malaga faapitoa mai o ia i le faailogaina o le 50 tausaga o le uluai vasega 6 a le Kolisi o Leulumoega Fou ma faalauiloa ai ma lana tusi, lea ua fuafua e lua isi vaega poo volumes, o le a faalauiloa i se taimi e mae’a ai ona tuu faatasia.
