O le aso mulimuli o le masina nei o Me o le a faia ai se sauniga a le Malo i le Taumeasina Island Resort o le a faalauiloa ai le tupe pepa fou $60 tala, o le a avea o se pine faamau o le faaiuina o polokalame uma o le 60 tausaga o le tutoatasi.
Ua faailoa e sui o le komiti o le tutoatasi i se feiloaiga ma tusitala i le Aso Lua o le vaiaso nei, o le tupe pepa fou o le a faaaoga e pei lava o isi tupe pepa a le atunuu.
Ua faailoa i lipoti a o lei faailoaina lea tupe pepa fou, o le ata o le afioga i le tamaitai Palemia, afioga Fiame Naomi Mataafa, ua lolomi i le tupe pepa 60 tala ma o se pine faamau tāua, ona o ia le uluai tamaitai e le gata i Samoa ae o le Pasefika, ua pale i le tofi Palemia na te taitaia pulega o le malo.
O loo tauave pea e tupe siliva ma nisi o tupe pepa a le atunuu ata o ē sa avea ma Ao o le Malo i tausaga ua mavae le susuga Malietoa Tanumafili II, ma le afioga i le Tama Aiga Tui Atua Tupua Tamasese Efi.
