O le sailiiliga na amatamea ai le faama’ite a le faalapotopotoga o le Toomaga mo ē Puapuagatia ina ia su’esu’e ma vailiili uma tulaga o sauāga o loo tutupu i Samoa ma aafia ai le itupa o tamaitai ma fanau teine faapea fanauiti, o lea ua mae’a ma o le a faailoa lautele i le Aso Tofi o le vaiaso nei, i se sauniga e faia i le faletalimalo o le Lava Hotel.
O se sailiiliga poo research study na galulue faatasi ai le Toomaga ma le Iunivesite Aoao o Samoa, o le University College i Lonetona i Peletania, ma le Ofisa o numera faamaumauina a lo tatou malo.
I se pepa o faalauiloa mai le faalapotopotoga o le Toomaga mo ē Puapuagatia o loo faailoa ai, o le taunuuga o lea sailiiliga o le a tuuina atu i le Malo, ma auaunaga tuma’oti ma sui o malo i fafo ina ia o latou silafia ai le tulaga o loo iai sauaga i le atunuu ma avanoa ai ona faia ni galuega fesoasoani e taofia ai.
