Ua faalauiloa le tala faatatau o le tupe a Niu Sa Uelese ma ua faailoa mai e aofia ai inivesi tetele e faatupula’ia ai avanoa mo le itupa o tamaitai, nisi o suiga tetele i a’oa’oga ma le faaitiitia o faigata i le faatauina o se uluai fale o se tagata poo se aiga foi. 

Ua ta’ua ua inivesi le 16.5 piliona mo le isi 10 tausaga e faateleina ai avanoa o le auai o tamaitai i galuega ma isi avanoa lelei i le tulaga tau le soifua mālōlōina. I le tulaga tau a’oa’oga ua iai vaega ua fetuuna’i e pei o le totogi o a’oa’oga mo a’oga amata aemaise tupe totogi i le daycare. O le a fesoasoani foi le malo i le tatalaina o nisi Childcare Centers i le setete.  

O le a fausia nisi a’oga fou e pei ona tu i le lipoti ma o le a faaleleia atili foi isi a’oga o loo iai nei i le itu i Sisifo o Sini ma isi vaega. O le tasi itu o le faalauiloa lea e le malo o se faiga fou e aofia ai se isi tausaga mo aoga ei luma mai o a’oga amata. 

Silia ma le 12 piliona ua tuuina i le fausia o le Metro West o le a avea o se nofoaga, underground train tunnel e fesoota’i ai Paramatta ma le ogatotonu o Sini.